鍵盤戰紀之新世紀鍵盤戰士 (3)

作者: 向東一江春水

我好記得，當時TVB既皇牌資訊節目《東西張望》，搵左個女主持係遮打花園附近訪問左唔同人士對於「佔中八百死士」既睇法……

的士司機：「超（嘟！）都唔知班友係到做mud鳩（嘟！）」

白領OL：「Eh…都尊重佢地和平理性表達意見既，不過就有少少阻街囉。」

自由行旅客：「耶挺油Chu呀！真味省過腥港人可以姐young爭取綿主。真絲耍B！哈哈哈哈！（字幕：也挺有趣呀！真沒想過香港人可以這樣爭取民主。真是傻B！哈哈哈哈！）」

之後鏡頭一轉，轉左入錄影廠，女主持宣佈今晚《東西張望繽紛選》既題目係：「你對佔領中環有咩睇法呢？A. 好阻街；B.好無聊；C.無所謂。」

結果呢集《東西張望》引起網民強烈反感，紛紛發起罷睇TVB，廣管局亦都收到幾百宗投訴，不過唔知點解，後日既娛樂版頭條依然都係：

「全城熱播！TVB台慶劇　《On Call 36小時 III》首集收視30點 過百萬觀眾收看！」

佔中八百死士最後梗係mud q都爭取唔到。佢地訓左七日之後，有D繼續返工返學，有D決定移民。不過朱教授同戴牧師真係好有恆心，佢地覺得香港人值得擁有一套更好既政治制度，亦都唔願意移民放棄香港，於是決定每年九月，都會籌辦佔中，話要「將商議式民主既種子深耕細作，發揚光大」咁話。搞下搞下，今年已經係第五屆。

講返開心公園現場既「佔領中環五周年」研討會，朱教授同戴牧師又係度講咩商議式民主理論，滿口學術用詞，真係悶到死。在座既學生得個小貓三四隻。都正常既。今日既香港大學，相當國際化，過半學生黎自內地各省各市，仲有一大班細細個就移民英美澳加，擺到明純粹返黎香港為搵食既ABC、BBC同CBC，好似我呢D真正係香港長大既既學生，連三成都冇，試問有幾多個會聽過佔領中環呢單野？

講完理論，阿朱教授話：「好咧！我地今日好高興，邀請到第一屆參與佔領中環既朋友黎做我地既嘉賓，同我地分享下佢當年參與佔中商討既經驗。」

下？ 嘉賓？我望雲四周，台上得阿朱教授同戴牧師，邊有嘉賓呀？

下？點解班搞手學生係到搞個Projector，將部手提電腦駁入去，然後開Skype打長途電話俾一個叫陳生既人既?

嘟嘟嘟嘟…嘟嘟嘟嘟…電話接通。

朱教授：「陳生你好！ 點呀收得清唔清楚呀?」

我係Projector到見到個中年阿叔同我地say hello，佢背後有間別墅，周圍鳥語花香，仲有幾個鬼佬係佢身後行過。

陳生：「收得好清楚呀！咁多位同學大家好！（揮手）」

朱教授：「點呀Melbourne個邊天氣點呀？」

陳生：「幾好呀幾好呀！今日幾好陽光。呢邊時間係（望下手上隻Rolex）……下晝一點幾到，岩岩食完飯。哈哈。」

戴牧師：「同學們！陳生呢，係我地佔領中環第一屆既參加者。今日好開心，佢係澳洲Melbourne都專程用Skype黎同我地傾計。我地俾D掌聲黎歡迎佢先！」

「啪！…啪！…啪啪！」

台下反應冷淡。係得個幾個搞手同學係到懶熱情咁笑住口拍手。

陳生四萬咁口，欣然接受掌聲，侃侃而談：「我係五年幾前，係第一屆佔中既參加者。當時我覺得呢，我自從三十幾年前大學畢業之後呀，剩係識得掛住搵錢，冇咩點諗過政治，都係時候，要為香港既民主，出番一份力。所以，我決定左，要去佔中，當係為香港既下一代，做番D野。直至到而家，雖然我已經移左民去澳洲，但係我都係心繫香港，支持香港既民主運動，仲有年年Keep住捐錢俾佔領中環。

「我好記得，當年我地係遮打花園，綁手綁腳咁，訓左足足七日。塊地板呀，真係好硬呀。晚晚都訓得好差，腰酸背痛。我覺得呀，香港既民主前途，而家真係要交俾你地呢班年輕人。你地呀，要記住，民主係唔會無啦啦係個天度跌落黎俾你地。而家D年青人呀，咩都係老馮既。唔識得去捱苦，去爭取。我覺得呢個心態係要改。」

我望住陳生，真係O撚晒咀。再望下台下既學生，我而家先認得其中幾個，係活躍社運既出位人物黎，有個仲係咩學聯秘書長。我見佢地，有D著住件哲古華拉Tee，有D著著住件A&F，不約而同揸住杯Starbucks，係度若有所思咁點頭，好同意陳生所講既野。

仆街……我有種天旋地轉既感覺。我覺得我眼前既發生緊既事，真係三個字：好撚荒謬。仆街！你班友讀咁多書，個腦係咪裝屎？有mud撚理由，搵個移左民，上晒岸既人，黎同你講，叫你犧牲自己黎爭取民主？台下班友又係到up咩頭呀！

我個人真係好頹。但係又唔知點樣發洩我既憤怒。我好想企出黎，指出呢班友有幾荒謬，有幾不知所謂……但係……我只係一個剩係識係網上打文發洩既小毒撚，講就兇狠，做就碌撚……何況，講左出黎，發洩完，又有咩用呢？

唔理得咁多咧！ 我終於忍唔住，行上台前，對住陳生大嗌：「你條仆街！移左民上晒岸，人都唔係香港，而家住洋樓養番狗！仲係度講mud撚野風涼話呀！」

然後我轉身對住班社運人士：「你班友又係度up mud撚野頭呀？搞社運飲咩Starbucks呀你老味！著mud撚野A&F呀！你知唔知自己係度做緊mud撚野？」

當我講完，雖然我真係有少少鬆一口氣既感覺，但係我知道：我金翅，仆街鳥。

鍵盤戰紀之新世紀鍵盤戰士 (2)

作者: 向東一江春水

幾經辛苦先逼到香港大學站落車，上樓梯出月台個陣，又俾把兩把女廣播聲嚇到半死。

「大家好！我係珠珠！」
「我係HiHi！」
「我地係地鐵小天使：珠珠同HiHi！今日我地同大家笑談廣東話，順便介紹一隻護膚精華俾大家……」

我即刻雞咁腳跑出去站，直奔Kong U。今時今日搭地鐵，心血少D都唔掂！

去到Kong U，雖然已經過晒九半，十點都黎緊頭，遲硬到，但係當我行過開心公園，我真係忍唔到住停一停低。原來有個政治系系會，有班學生搞左個「佔領中環五周年」研討會，邀請左當年發起「佔中」既朱教授同戴牧師做講者。

真係唔講都唔記得，今年原來係「讓和平與愛佔領中環」五周年。幾年前，有班中年香港人誓神劈願，話要為下一代爭取民主公義，要搞公民抗命，堵塞馬路，逼政府俾真普選香港人。結果二零一四年九月，當七一遊行過左成兩個月，D民怨攤到凍晒，連蘋果頭版都只係報導「全城熱炒iPhone 7」既時候，政府突然公佈政改方案，提出沿用當時既提名委員會制度，按比例將委員會增加至二千四百人，提名門檻為三百人，提名最多三個特首候選人供全香港合資格選民選出。泛民主派本來一致反對，喊打喊殺，又話要辭職公投，又話要訓街抗爭，佔領中環又盛。眼見公民抗命一觸即發。點知只係隔左一個星期，政府再公佈「優化方案」，將提名委員會增加至三千六百人，提名門檻降低至一百五十人，可以提名最多五個候選人，班泛民一見到自己友實有機會入閘，即刻紛紛轉軚支持，話方案「符合民主」，大家應該「收住貨先」，「有幾多攞幾多」，「接受左呢個方案先再爭取個更民主既方案」。

本來佔中真係如箭在弦，一觸即發咁濟，點知俾泛民一個回馬鎗，當堂將阿朱教授同戴牧師一鑊翹起。不過當年仍然有唔少市民唔接受方案，紛紛讉責泛民背叛選民，社運人士乘勢發起包圍立法會，並發起「萬人跪拜大行動」，號召市民上街跪求泛民議員憑良心投反對票。政改表決個日，立法會圍左成十幾萬人，係資深社運人士（唔開名喇…自己估啦）既帶領下，跪晒係立法會門前，行三跪九叩之禮，場面偉大壯觀，仲俾蘋果記者係上空影左個Long Shot做頭條：「萬人跪拜，我要真普選」。

結果點？政改方案獲大比數通過，參與跪拜既市民和平散去，資深社運人士發起成立「真真真普選大聯盟」（簡稱「真真真普聯」），並將聯盟註冊成為有限公司，長期抗爭，長期籌款。佢地仲夠膽死向「健力士世界大全」申請，將「萬人跪拜大行動」註冊成為全世界「最和平理性非暴力非粗口既民主運動」，用呢個記錄黎做佢地每年籌款既生招牌。

「萬人跪拜大行動」之後，香港人爭取民主既士氣已經消耗得七七八八。我仲記得當年行出街，個個人都面如死灰，去茶餐廳食野，成日聽到人話要移民。但係朱教授同戴牧師真係香港既良心，佢地冇放棄到爭取民主既信念，明知會好少人，明知會衰梗，明知不可為而為之，都要背水一戰，發起佔領中環，免得辜負無數當年參與佔中商討日既市民。

最後，係佔中當日，有八百個市民響應上街。佢地被蘋果形容為「佔中八百死士」。個日係星期日黎，氣溫都成三十幾度。呢八百人，係朱教授同戴牧師既指示下，用麻繩將自己既手腳綁起，訓係中環既遮打花園。佢地本來想訓皇后像廣場，但係個度已經一早俾菲傭佔領左。經過幾輪商討，佢地覺得遮打花園樹蔭比較多，地板冇咁熱，佔領起黎應該冇咁易中暑，所以揀左遮打花園。呀，唔記得講，佢地本來係想堵塞馬路既，但係經過幾輪商討之後，佢地覺得咁樣會有可以引起交通意外，傷及無辜既市民，於是唯有放棄。

呢八百個人，結果係遮打花園訓左足足七日。係呢七日入邊，一個解放軍、一架坦克車都冇黎過鎮壓佢地，傳說中既防暴隊亦都冇出現過，現埸連一個鐵馬都冇，只係有幾個軍裝警察在場戒備。

鍵盤戰紀之新世紀鍵盤戰士 (1)

作者: 向東一江春水

大家好，我係向東，英文名Eastward。我正職係學生，副業係鍵盤戰士，亦即係世俗人眼中既，毒撚。但係坦白講，我覺得我呢個毒撚都做得幾成功，因為我經常都係網絡媒體輔仁網投稿。呢個網既總編，容總，都算唔話得，每個月都會俾番幾舊水稿費我做零用錢¹。試問做鍵盤戰士，有咩正得過係網上寫文，有專人幫你貼文，搵配圖，Post上Facebook同你推，仲要有錢收？

今日係二零一八年九月三日，亦即係開學日。今日我要返早。唉，返早最憎就係逼地鐵。八點幾去到油塘站，個月台已經塞到爆晒棚，條人龍排到上樓梯口。冇計啦！今日我地香港既人口已經直逼一千萬。而家既單程證配額已經增加到每日二百人，而自由行呀、優才計劃呀、內地生來港讀大學呀，年年政府都話要加大力度，令香港能夠「全面面向祖國」，咪搞到人口爆棚囉！呀長毛、社記、白鴿、工黨、左廿、學聯學民個D，一日到黑上街，一邊呼籲市民唔好歧視由內地來港既新香港人，一邊又話咩要爭取政府增加配套設施，減輕人口增加帶黎既壓力。收皮啦好心！呢D野班友嗌左十年都黎緊頭，由中學雞到大學雞，由青年人到老年人，政府十年黎都係睬佢地有味。

呢舖起碼要又要等十幾班車先上到車咧！幾經辛苦我先落到月台等車，身邊既打工仔學生哥個個粒聲唔出係到玩電話。我都唔明，都已經逼到好似沙甸魚咁，仲可以夾硬拎部電話出黎督。月台對面既廣告牌係度大大聲播廣告，嘈死人。

「先生唔該行前少少等車丫！先生唔該合作下丫！」突然間有把女高音係我耳邊大嗌。

頂佢個肺！又係個D咩上車師奶輔導員！心血少D都俾佢嚇撚死！前幾日睇報紙，先有個阿婆就係因為上車行動慢，俾D上車輔導員催到中風癱左！

晨早流流要好似沙甸魚咁逼地鐵，仲要俾個上車輔導員嚇餐死，真係火都黎！「得啦！我有分數啦！你老……人家唔使操心咧！」

嘩！好彩兜到！冇講到粗口！今年立法會史無前例，係建制派同泛民主派支持下，以大比數通過《講粗口刑事化法案》，係公眾地方講廣東粗口，會被罸款五千，最高監禁三個月。法案通過之前，輿論普遍擔心法案會侵犯言論自由，當時泛民主派有個資深大律師議員，話會為民請命，盡量將法案對言論自由既侵犯減到最低。結果佢爭取左D咩？就係新法案只適用於廣東粗口，其他地區既粗口，包括英文粗口同普通話粗口，全部獲豁免。唉，都唔知笑佢天真定戇鳩。

每當有車黎既時候，D人就會博晒老命咁將自己塞到個車廂到，博命塞博命塞，完全唔當自己係人，而係貨咁夾硬塞入去。塞左幾輪，終於輪到我。咁岩身邊有個背心短裙既OL，同我身對身逼到實一實，係到對住我gip gip聲。阿姐，我知，我唔係洋人，我亦冇錢，我只係一個香港本地毒撚，一身T-Shirt牛仔褲，個Look好頹好廢青，亦都唔識得好似某社運女神咁，會去買名牌包裝自己，大搖大擺著住件GAP去支持工運。但我唔係變態咸濕佬。你今日要同我一齊逼地鐵，捱張年年加價，而家加到成廿幾蚊一程既過海飛，你同我一撚樣ja ! 有本事就搵個有錢佬嫁左佢，你咪變上等人，唔使同我呢D廢青逼地鐵囉！

好不容易先捱到去北角。不得了，一開門，幾百人爭先恐後咁湧出黎，賽跑咁跑去對面月台轉車入港島線。北角站既月台隧道特別長，當我被逼跟住人潮逼出車既時候，我覺得自己好似一條精蟲，一生都要不停博命同其他精蟲賽跑，當你唔夠其他精蟲跑得快，你既下場只有一個：就係死亡。

「哎呀！」我俾個OL kick低，成個人仆左落街。身邊既人無情咁行過，甚至有條西裝友直行直過踩左我一腳。曾經何時，香港人好樂意幫人，就算係冷漠D，都唔會衰到踩多人一腳。不過近幾年黎，有好多大陸人係條街度扮頭暈身㷫引人問候，然後再屈人錢既騙案，令到香港人而家普遍怕係街邊幫人。

「先生先生！唔該上前等車丫！唔該合作下丫！」又有個上車輔導員衝埋黎，用把機械式既高音催我上車。

我終於忍唔住，喊左出黎。我覺得我似精蟲之餘，亦都好似一隻豬，而呢度就係一個豬圈。豬圈入邊既豬，每一日訓醒，俾主人餵飽之後，就要驅趕去勞役、繁殖。當佢地俾主人利用完，搾乾搾淨，就會俾屠夫一刀劏死，製成豬肉俾主人享用，食完，痾番出黎，化為肥料，再用黎餵飼更多既豬。

我依晞記得，係我好細個個陣，香港唔係咁。曾經，呢度係一個人人讚好，安居樂業既好地方……