作者: 向東一江春水
大家好，我係向東，英文名Eastward。我正職係學生，副業係鍵盤戰士，亦即係世俗人眼中既，毒撚。但係坦白講，我覺得我呢個毒撚都做得幾成功，因為我經常都係網絡媒體輔仁網投稿。呢個網既總編，容總，都算唔話得，每個月都會俾番幾舊水稿費我做零用錢1。試問做鍵盤戰士，有咩正得過係網上寫文，有專人幫你貼文，搵配圖，Post上Facebook同你推，仲要有錢收？
今日係二零一八年九月三日，亦即係開學日。今日我要返早。唉，返早最憎就係逼地鐵。八點幾去到油塘站，個月台已經塞到爆晒棚，條人龍排到上樓梯口。冇計啦！今日我地香港既人口已經直逼一千萬。而家既單程證配額已經增加到每日二百人，而自由行呀、優才計劃呀、內地生來港讀大學呀，年年政府都話要加大力度，令香港能夠「全面面向祖國」，咪搞到人口爆棚囉！呀長毛、社記、白鴿、工黨、左廿、學聯學民個D，一日到黑上街，一邊呼籲市民唔好歧視由內地來港既新香港人，一邊又話咩要爭取政府增加配套設施，減輕人口增加帶黎既壓力。收皮啦好心！呢D野班友嗌左十年都黎緊頭，由中學雞到大學雞，由青年人到老年人，政府十年黎都係睬佢地有味。
呢舖起碼要又要等十幾班車先上到車咧！幾經辛苦我先落到月台等車，身邊既打工仔學生哥個個粒聲唔出係到玩電話。我都唔明，都已經逼到好似沙甸魚咁，仲可以夾硬拎部電話出黎督。月台對面既廣告牌係度大大聲播廣告，嘈死人。
「先生唔該行前少少等車丫！先生唔該合作下丫！」突然間有把女高音係我耳邊大嗌。
頂佢個肺！又係個D咩上車師奶輔導員！心血少D都俾佢嚇撚死！前幾日睇報紙，先有個阿婆就係因為上車行動慢，俾D上車輔導員催到中風癱左！
晨早流流要好似沙甸魚咁逼地鐵，仲要俾個上車輔導員嚇餐死，真係火都黎！「得啦！我有分數啦！你老……人家唔使操心咧！」
嘩！好彩兜到！冇講到粗口！今年立法會史無前例，係建制派同泛民主派支持下，以大比數通過《講粗口刑事化法案》，係公眾地方講廣東粗口，會被罸款五千，最高監禁三個月。法案通過之前，輿論普遍擔心法案會侵犯言論自由，當時泛民主派有個資深大律師議員，話會為民請命，盡量將法案對言論自由既侵犯減到最低。結果佢爭取左D咩？就係新法案只適用於廣東粗口，其他地區既粗口，包括英文粗口同普通話粗口，全部獲豁免。唉，都唔知笑佢天真定戇鳩。
每當有車黎既時候，D人就會博晒老命咁將自己塞到個車廂到，博命塞博命塞，完全唔當自己係人，而係貨咁夾硬塞入去。塞左幾輪，終於輪到我。咁岩身邊有個背心短裙既OL，同我身對身逼到實一實，係到對住我gip gip聲。阿姐，我知，我唔係洋人，我亦冇錢，我只係一個香港本地毒撚，一身T-Shirt牛仔褲，個Look好頹好廢青，亦都唔識得好似某社運女神咁，會去買名牌包裝自己，大搖大擺著住件GAP去支持工運。但我唔係變態咸濕佬。你今日要同我一齊逼地鐵，捱張年年加價，而家加到成廿幾蚊一程既過海飛，你同我一撚樣ja ! 有本事就搵個有錢佬嫁左佢，你咪變上等人，唔使同我呢D廢青逼地鐵囉！
好不容易先捱到去北角。不得了，一開門，幾百人爭先恐後咁湧出黎，賽跑咁跑去對面月台轉車入港島線。北角站既月台隧道特別長，當我被逼跟住人潮逼出車既時候，我覺得自己好似一條精蟲，一生都要不停博命同其他精蟲賽跑，當你唔夠其他精蟲跑得快，你既下場只有一個：就係死亡。
「哎呀！」我俾個OL kick低，成個人仆左落街。身邊既人無情咁行過，甚至有條西裝友直行直過踩左我一腳。曾經何時，香港人好樂意幫人，就算係冷漠D，都唔會衰到踩多人一腳。不過近幾年黎，有好多大陸人係條街度扮頭暈身㷫引人問候，然後再屈人錢既騙案，令到香港人而家普遍怕係街邊幫人。
「先生先生！唔該上前等車丫！唔該合作下丫！」又有個上車輔導員衝埋黎，用把機械式既高音催我上車。
我終於忍唔住，喊左出黎。我覺得我似精蟲之餘，亦都好似一隻豬，而呢度就係一個豬圈。豬圈入邊既豬，每一日訓醒，俾主人餵飽之後，就要驅趕去勞役、繁殖。當佢地俾主人利用完，搾乾搾淨，就會俾屠夫一刀劏死，製成豬肉俾主人享用，食完，痾番出黎，化為肥料，再用黎餵飼更多既豬。
我依晞記得，係我好細個個陣，香港唔係咁。曾經，呢度係一個人人讚好，安居樂業既好地方……
No comments:
Post a Comment