鍵盤戰紀之新世紀鍵盤戰士 (2)

作者: 向東一江春水

幾經辛苦先逼到香港大學站落車，上樓梯出月台個陣，又俾把兩把女廣播聲嚇到半死。

「大家好！我係珠珠！」
「我係HiHi！」
「我地係地鐵小天使：珠珠同HiHi！今日我地同大家笑談廣東話，順便介紹一隻護膚精華俾大家……」

我即刻雞咁腳跑出去站，直奔Kong U。今時今日搭地鐵，心血少D都唔掂！

去到Kong U，雖然已經過晒九半，十點都黎緊頭，遲硬到，但係當我行過開心公園，我真係忍唔到住停一停低。原來有個政治系系會，有班學生搞左個「佔領中環五周年」研討會，邀請左當年發起「佔中」既朱教授同戴牧師做講者。

真係唔講都唔記得，今年原來係「讓和平與愛佔領中環」五周年。幾年前，有班中年香港人誓神劈願，話要為下一代爭取民主公義，要搞公民抗命，堵塞馬路，逼政府俾真普選香港人。結果二零一四年九月，當七一遊行過左成兩個月，D民怨攤到凍晒，連蘋果頭版都只係報導「全城熱炒iPhone 7」既時候，政府突然公佈政改方案，提出沿用當時既提名委員會制度，按比例將委員會增加至二千四百人，提名門檻為三百人，提名最多三個特首候選人供全香港合資格選民選出。泛民主派本來一致反對，喊打喊殺，又話要辭職公投，又話要訓街抗爭，佔領中環又盛。眼見公民抗命一觸即發。點知只係隔左一個星期，政府再公佈「優化方案」，將提名委員會增加至三千六百人，提名門檻降低至一百五十人，可以提名最多五個候選人，班泛民一見到自己友實有機會入閘，即刻紛紛轉軚支持，話方案「符合民主」，大家應該「收住貨先」，「有幾多攞幾多」，「接受左呢個方案先再爭取個更民主既方案」。

本來佔中真係如箭在弦，一觸即發咁濟，點知俾泛民一個回馬鎗，當堂將阿朱教授同戴牧師一鑊翹起。不過當年仍然有唔少市民唔接受方案，紛紛讉責泛民背叛選民，社運人士乘勢發起包圍立法會，並發起「萬人跪拜大行動」，號召市民上街跪求泛民議員憑良心投反對票。政改表決個日，立法會圍左成十幾萬人，係資深社運人士（唔開名喇…自己估啦）既帶領下，跪晒係立法會門前，行三跪九叩之禮，場面偉大壯觀，仲俾蘋果記者係上空影左個Long Shot做頭條：「萬人跪拜，我要真普選」。

結果點？政改方案獲大比數通過，參與跪拜既市民和平散去，資深社運人士發起成立「真真真普選大聯盟」（簡稱「真真真普聯」），並將聯盟註冊成為有限公司，長期抗爭，長期籌款。佢地仲夠膽死向「健力士世界大全」申請，將「萬人跪拜大行動」註冊成為全世界「最和平理性非暴力非粗口既民主運動」，用呢個記錄黎做佢地每年籌款既生招牌。

「萬人跪拜大行動」之後，香港人爭取民主既士氣已經消耗得七七八八。我仲記得當年行出街，個個人都面如死灰，去茶餐廳食野，成日聽到人話要移民。但係朱教授同戴牧師真係香港既良心，佢地冇放棄到爭取民主既信念，明知會好少人，明知會衰梗，明知不可為而為之，都要背水一戰，發起佔領中環，免得辜負無數當年參與佔中商討日既市民。

最後，係佔中當日，有八百個市民響應上街。佢地被蘋果形容為「佔中八百死士」。個日係星期日黎，氣溫都成三十幾度。呢八百人，係朱教授同戴牧師既指示下，用麻繩將自己既手腳綁起，訓係中環既遮打花園。佢地本來想訓皇后像廣場，但係個度已經一早俾菲傭佔領左。經過幾輪商討，佢地覺得遮打花園樹蔭比較多，地板冇咁熱，佔領起黎應該冇咁易中暑，所以揀左遮打花園。呀，唔記得講，佢地本來係想堵塞馬路既，但係經過幾輪商討之後，佢地覺得咁樣會有可以引起交通意外，傷及無辜既市民，於是唯有放棄。

呢八百個人，結果係遮打花園訓左足足七日。係呢七日入邊，一個解放軍、一架坦克車都冇黎過鎮壓佢地，傳說中既防暴隊亦都冇出現過，現埸連一個鐵馬都冇，只係有幾個軍裝警察在場戒備。